భద్రాచలం కొల్లుగూడెం ర్యాంపు వద్ద అర్ధరాత్రి ఇసుక రవాణా కలకలం

భద్రాచలం కొల్లుగూడెం ఇసుక ర్యాంపు కేంద్రంగా అర్ధరాత్రి వేళ ట్రాక్టర్ల ద్వారా ఇసుక తరలింపు జరుగుతోందన్న ఆరోపణలు స్థానికంగా కలకలం రేపుతున్నాయి. గోదావరి నీటిమట్టం తగ్గుముఖం పట్టడంతో పాటు, స్థానిక పోలీస్ అధికారుల బదిలీల నేపథ్యంలో అక్రమ ఇసుక రవాణా మళ్లీ ఊపందుకుందనే విమర్శలు వినిపిస్తున్నాయి. గత రాత్రి కొల్లుగూడెం ర్యాంపు పరిసరాల్లో పదుల సంఖ్యలో ట్రాక్టర్లు సంచరించినట్లు స్థానికులు చెబుతున్నారు. భారీ శబ్దాలు, వేగంగా వెళ్తున్న వాహనాలతో శివారు కాలనీల ప్రజలు ఇబ్బందులు ఎదుర్కొన్నారని, రాత్రివేళ ప్రశాంతతకు భంగం కలుగుతోందని వారు ఆవేదన వ్యక్తం చేస్తున్నారు. ఈ నేపథ్యంలో కొందరు స్థానికులు పోలీసుల డయల్‌-100కు సమాచారం ఇచ్చినట్లు తెలుస్తోంది. పోలీసులు అక్కడికి వస్తున్నారనే సమాచారం అందడంతో ట్రాక్టర్లు అక్కడి నుంచి వెళ్లిపోయినట్లు స్థానికుల వాదన. అయితే ఈ ఘటనపై అధికారికంగా ఎంతమంది వాహనాలు పట్టుబడ్డాయి, ఎలాంటి కేసులు నమోదయ్యాయి అనే వివరాలు స్పష్టంగా తెలియాల్సి ఉంది. ఇసుక అక్రమ రవాణాపై గతంలోనూ అధికారులు చర్యలు తీసుకున్నప్పటికీ, సమస్య పూర్తిగా పరిష్కారం కావడం లేదనే అభిప్రాయం స్థానికుల్లో వ్యక్తమవుతోంది. కేవలం జరిమానాలు, తాత్కాలిక కేసులతో సరిపెట్టడం వల్ల అక్రమ రవాణాకు అడ్డుకట్ట పడటం లేదని వారు అంటున్నారు. గోదావరి నది పరిరక్షణతో పాటు, రాత్రివేళ అక్రమ రవాణాను నియంత్రించేందుకు రెవెన్యూ, పోలీస్, మైనింగ్ శాఖలు సమన్వయంతో పర్యవేక్షణ పెంచాల్సిన అవసరం ఉందని స్థానికులు కోరుతున్నారు. కొల్లుగూడెం ర్యాంపు వద్ద శాశ్వత నిఘా ఏర్పాటు చేసి, నిబంధనలకు విరుద్ధంగా ఇసుక తరలిస్తున్న వాహనాలపై చట్ట ప్రకారం చర్యలు తీసుకోవాలని వారు డిమాండ్ చేస్తున్నారు.