Bigg Boss Telugu 10: తొలి కెప్టెన్‌గా ఝాన్సీ.. రామ్‌ప్రసాద్‌కు ఊహించని షాక్

బిగ్ బాస్ తెలుగు సీజన్ 10లో తొలి కెప్టెన్ ఎవరు అనే ఉత్కంఠకు తెరపడింది. కెప్టెన్సీ కోసం జరిగిన చివరి పోరులో ఝాన్సీ విజయం సాధించి ఈ సీజన్‌కు తొలి కెప్టెన్‌గా నిలిచింది. ఫైనల్‌లో రామ్‌ప్రసాద్‌తో తలపడిన ఝాన్సీ.. కీలక సమయంలో మెరుగైన ప్రదర్శనతో కెప్టెన్సీని సొంతం చేసుకుంది. కెప్టెన్సీ రేసులో త్రిగుణ్, రామ్‌ప్రసాద్, ఝాన్సీ, ముకేశ్, షాలిని పోటీ పడగా.. బిగ్ బాస్ వారికి ‘చిక్కకు–దొరకకు’ అనే దొంగా–పోలీస్ తరహా టాస్క్‌ను నిర్వహించారు. ఇందులో జైలు నుంచి గార్డులను తప్పించుకుని సేఫ్ జోన్‌కు చేరుకోవాల్సి ఉంటుంది. టాస్క్ సాగుతున్న కొద్దీ పోటీ తీవ్రత పెరగడంతో పాటు హౌస్‌లో వాగ్వాదాలు కూడా చోటుచేసుకున్నాయి. ముఖ్యంగా షాలినిని టార్గెట్ చేయడంపై కొందరు కంటెస్టెంట్ల మధ్య అభిప్రాయ భేదాలు వ్యక్తమయ్యాయి. ముకేశ్, షాలిని మధ్య మాటల యుద్ధం కూడా జరిగింది. మరోవైపు త్రిగుణ్ ప్రవర్తనపై కొందరు హౌస్‌మేట్స్ అసంతృప్తి వ్యక్తం చేశారు. ఓటమి అనంతరం త్రిగుణ్ చేసిన వ్యాఖ్యలు కూడా హౌస్‌లో చర్చకు దారితీశాయి. చివరకు ఫైనల్ రౌండ్‌కు రామ్‌ప్రసాద్, ఝాన్సీ చేరుకున్నారు. ఈ దశలో కట్టర్‌తో కంచెను కట్ చేయడం, తాళాలు తీసి బాక్స్‌లోని బరువులను ఉపయోగించి కెప్టెన్ జెండాను పైకి లాగడం వంటి దశలతో టాస్క్ కొనసాగింది. రామ్‌ప్రసాద్ కొన్ని దశల్లో తడబడగా.. ఝాన్సీ ఆ అవకాశాన్ని సద్వినియోగం చేసుకుని టాస్క్‌ను పూర్తి చేసింది. దీంతో ఝాన్సీ బిగ్ బాస్ తెలుగు సీజన్ 10 తొలి కెప్టెన్‌గా నిలిచింది. గోల్డెన్ టికెట్ ద్వారా ఈ సీజన్‌లోకి ఎంట్రీ ఇచ్చిన ఝాన్సీకి ఈ విజయం హౌస్‌లో తన స్థానం మరింత బలపరిచే పరిణామంగా మారింది. ఇక కెప్టెన్సీ టాస్క్‌తో పాటు హౌస్‌లో వినోదభరిత సన్నివేశాలు కూడా కొనసాగాయి. వంశీని షాలిని ప్రశంసించగా.. వర్షిణి, చరణ్ మధ్య సరదా సంభాషణలు చోటుచేసుకున్నాయి. వంశీ, నరేష్, రోహిత్, త్రిగుణ్, అమన్, రామ్‌ప్రసాద్ కలిసి ‘ఛత్రపతి’ సినిమా సన్నివేశాన్ని రీ-క్రియేట్ చేసి హౌస్‌లో నవ్వులు పూయించారు. వీకెండ్ ఎపిసోడ్‌కు సమయం దగ్గరపడుతున్న నేపథ్యంలో.. ఈ వారం నామినేషన్స్‌లో ఉన్నవారిలో ఎవరు ఎలిమినేట్ అవుతారన్న ఉత్కంఠ కొనసాగుతోంది. అయితే ప్రస్తుతానికి కెప్టెన్సీ పోరులో ఝాన్సీ విజయం సాధించడం ఈ సీజన్‌లో తాజా కీలక పరిణామంగా నిలిచింది.