Chennur: చెన్నూర్‌లో 1.20 కిలోల గంజాయి పట్టివేత.. ఇద్దరు అరెస్ట్

మంచిర్యాల జిల్లా చెన్నూర్‌లో గంజాయి అక్రమ రవాణాపై పోలీసులు చర్యలు చేపట్టారు. చెన్నూర్‌ పట్టణ సమీపంలోని 63వ జాతీయ రహదారిపై అస్నాద్‌ ఎక్స్‌ రోడ్డు వద్ద రామగుండం టాస్క్‌ఫోర్స్‌, చెన్నూర్‌ పట్టణ పోలీసులు సంయుక్తంగా నిర్వహించిన వాహన తనిఖీల్లో ఇద్దరు యువకులు పట్టుబడ్డారు. పోలీసుల వివరాల ప్రకారం.. మహారాష్ట్రలోని గడ్చిరోలి జిల్లా తొడ్సీ గ్రామం నుంచి వేములవాడకు నంబర్‌ ప్లేట్‌ లేని KTM బైక్‌పై వెళ్తున్న ఇద్దరు యువకులను పోలీసులు అనుమానంతో ఆపి తనిఖీ చేశారు. వారి వద్ద 1 కిలో 20 గ్రాముల గంజాయి గుర్తించి స్వాధీనం చేసుకున్నారు. గంజాయి విలువ సుమారు రూ.15 వేలుగా ఉంటుందని పోలీసులు తెలిపారు. వారితో పాటు ఒక సెల్‌ఫోన్‌, రూ.2 వేల నగదు, బైక్‌, ఏటీఎం కార్డును కూడా స్వాధీనం చేసుకున్నట్లు వెల్లడించారు. విచారణలో నిందితులు కొంతకాలంగా గంజాయి సేవించడంతో పాటు, మహారాష్ట్రలో గుర్తుతెలియని వ్యక్తుల నుంచి తక్కువ ధరకు గంజాయి కొనుగోలు చేసి, వేములవాడ పరిసర ప్రాంతాల్లో ఎక్కువ ధరకు విక్రయిస్తున్నట్లు తెలిపారని పోలీసులు పేర్కొన్నారు. ఈ క్రమంలో రూ.4 వేలతో గంజాయి కొనుగోలు చేసి వేములవాడకు తరలిస్తుండగా పట్టుకున్నట్లు తెలిపారు. ఈ ఘటనపై ఇద్దరు నిందితులపై కేసు నమోదు చేసిన పోలీసులు.. వారిని కోర్టులో హాజరుపరిచి రిమాండ్‌కు తరలించారు. గంజాయి సరఫరాకు సంబంధించిన ఇతర వ్యక్తులపై కూడా దర్యాప్తు కొనసాగిస్తున్నట్లు పోలీసులు తెలిపారు. గంజాయి సేవించడం, రవాణా చేయడం, విక్రయించడం వంటి చర్యలకు పాల్పడితే కఠిన చర్యలు తప్పవని హెచ్చరించారు.