దిల్లీలో మైనర్ బాలికపై సామూహిక అత్యాచారం, హత్య.. నలుగురు నిందితులు అరెస్ట్

దిల్లీలో మైనర్ బాలికపై సామూహిక అత్యాచారం, హత్యకు సంబంధించిన దారుణ ఘటన వెలుగులోకి వచ్చింది. ఉత్తర దిల్లీలోని స్వరూప్ నగర్ ప్రాంతంలో ఈ ఘటన జరిగినట్లు పోలీసులు తెలిపారు. కేసులో నలుగురు నిందితులను అదుపులోకి తీసుకోగా.. వారిలో ముగ్గురు మైనర్లు ఉన్నట్లు వెల్లడించారు. పోలీసుల వివరాల ప్రకారం.. దిల్లీకి చెందిన 17 ఏళ్ల బాలిక కొద్ది రోజుల క్రితం తన స్నేహితుడిని కలిసేందుకు ఇంటి నుంచి బయటకు వెళ్లింది. అనంతరం ఆ స్నేహితుడితో పాటు మరో ముగ్గురు మైనర్లు కలిసి టెంపోలో ప్రయాణించినట్లు దర్యాప్తులో గుర్తించారు. వాహనంలో ఉన్న సమయంలో నిందితులు మద్యం సేవించి, బాలికపై సామూహిక అత్యాచారానికి పాల్పడినట్లు పోలీసులు ఆరోపిస్తున్నారు. ఈ విషయం బయటకు వస్తుందనే భయంతో బాలికను కత్తితో పొడిచి హత్య చేసినట్లు దర్యాప్తులో వెల్లడైందని పోలీసులు తెలిపారు. అనంతరం మృతదేహాన్ని ఉత్తర దిల్లీలోని స్వరూప్ నగర్ పరిధిలోని పొలాల్లో పడేసినట్లు చెప్పారు. సెప్టెంబర్ 13న స్థానికుల సమాచారంతో పోలీసులు అక్కడికి చేరుకున్నారు. అప్పటికే మృతదేహం గుర్తుపట్టలేని స్థితిలో ఉండటంతో పాటు.. జంతువుల కారణంగా శరీర భాగాలు దెబ్బతిన్నట్లు పోలీసులు గుర్తించారు. బాలిక తరచూ ఇంటికి రాకపోవడంతో కుటుంబ సభ్యులు తొలుత పోలీసులకు ఫిర్యాదు చేయలేదని సమాచారం. స్థానికుల సమాచారం, సీసీటీవీ ఫుటేజీ ఆధారంగా దర్యాప్తు చేపట్టిన పోలీసులు.. బాలిక ప్రయాణించిన టెంపోను గుర్తించారు. అనంతరం నలుగురు నిందితులను అదుపులోకి తీసుకున్నారు. వారి వద్ద నుంచి హత్యకు ఉపయోగించినట్లు అనుమానిస్తున్న కత్తులను స్వాధీనం చేసుకున్నారు. ఈ ఘటనపై పోక్సో చట్టంతో పాటు సంబంధిత క్రిమినల్ చట్టాల కింద కేసు నమోదు చేసి పోలీసులు దర్యాప్తు కొనసాగిస్తున్నారు. నిందితుల వాంగ్మూలాలు, సీసీటీవీ ఫుటేజీ, ఇతర ఆధారాలను పరిశీలిస్తున్నట్లు అధికారులు తెలిపారు.