ఏలూరు రేంజ్ పోలీసుల క్రీడా ప్రతిభ.. 308 పతకాలతో సత్తా

ఏలూరు: పోలీస్ విధుల్లోనే కాకుండా క్రీడా రంగంలోనూ ఏలూరు రేంజ్ పోలీసులు తమ ప్రతిభను చాటుకున్నారు. మంగళగిరిలో నిర్వహించిన ఏపీ పోలీస్ స్పోర్ట్స్ మీట్–2026లో ఏలూరు రేంజ్‌కు చెందిన పోలీస్ క్రీడాకారులు ఏకంగా 308 పతకాలు సాధించి ప్రత్యేక గుర్తింపు పొందారు. ఆంధ్రప్రదేశ్ పోలీస్ శాఖ ఆధ్వర్యంలో మంగళగిరిలోని VIT యూనివర్సిటీలో ఈ నెల 1 నుంచి 4వ తేదీ వరకు పోలీస్ స్పోర్ట్స్ మీట్–2026 నిర్వహించారు. రాష్ట్రవ్యాప్తంగా పోలీస్ క్రీడాకారులు పాల్గొన్న ఈ పోటీల్లో ఏలూరు రేంజ్ క్రీడాకారులు పలు విభాగాల్లో ప్రతిభ కనబరిచారు. ఏలూరు రేంజ్ సాధించిన 308 పతకాల్లో 119 గోల్డ్, 116 సిల్వర్, 73 బ్రాంజ్ మెడల్స్ ఉన్నాయి. దీంతో మొత్తం పతకాల సంఖ్యలో ఏలూరు రేంజ్ క్రీడాకారుల ప్రదర్శన ప్రత్యేకంగా నిలిచింది. పతక విజేతలను అభినందించేందుకు ఏలూరు అమీనా పేటలోని పోలీస్ కళ్యాణ మండపంలో ప్రత్యేక కార్యక్రమం నిర్వహించారు. ఈ కార్యక్రమంలో రేంజ్ ఐజీ జి.వి.జి. అశోక్ కుమార్, ఏలూరు జిల్లా ఎస్పీ కె. ప్రతాప్ శివ కిషోర్, అదనపు ఎస్పీ (అడ్మిన్) వై. ప్రసాదరావు పాల్గొని క్రీడాకారులను అభినందించారు. పోలీస్ సిబ్బందిలో శారీరక దృఢత్వంతో పాటు మానసిక ఉల్లాసం, క్రమశిక్షణ, ఏకాగ్రత, సమయస్ఫూర్తి, జట్టు స్ఫూర్తిని పెంపొందించడంలో క్రీడలు కీలక పాత్ర పోషిస్తాయని అధికారులు పేర్కొన్నారు. విధి నిర్వహణతో పాటు క్రీడల్లోనూ ప్రతిభ చూపి ఏలూరు రేంజ్‌కు మంచి పేరు తీసుకొచ్చిన క్రీడాకారులను వారు ప్రత్యేకంగా అభినందించారు.