ఖమ్మం: లేఔట్ అనుమతులపై కలెక్టర్ కీలక ఆదేశాలు

ఖమ్మం జిల్లాలో లేఔట్ అనుమతుల జారీ ప్రక్రియను మరింత కట్టుదిట్టం చేయాలని జిల్లా కలెక్టర్ దివాకర్ టీఎస్ అధికారులను ఆదేశించారు. ముఖ్యంగా చెరువులు, నీటి వనరులు, ఎఫ్‌టీఎల్‌, బఫర్‌ జోన్ పరిధిలో ఎలాంటి లేఔట్లకు అనుమతులు ఇవ్వకూడదని స్పష్టం చేశారు. కలెక్టరేట్‌లో నిర్వహించిన జిల్లా స్థాయి లేఔట్ కమిటీ సమావేశంలో పెండింగ్‌ దరఖాస్తులపై రెవెన్యూ, ఇరిగేషన్‌, ఎన్‌పీడీసీఎల్‌, టౌన్‌ ప్లానింగ్‌ తదితర శాఖల అధికారులతో కలెక్టర్ సమీక్షించారు. ప్రతి దరఖాస్తుపై సంబంధిత శాఖల రిమార్కులు, అభ్యంతరాలు, ఎన్‌ఓసీల స్థితిగతులను పరిశీలించారు. లేఔట్ కమిటీ ఆమోదం పొందిన తర్వాత ఆన్‌లైన్‌ అనుమతి ప్రక్రియను మూడు రోజుల్లో పూర్తి చేయాలని అధికారులను ఆదేశించారు. క్షేత్రస్థాయిలో సంయుక్త తనిఖీలు నిర్వహించి, ప్రతిపాదిత భూమి నీటి వనరులు, ఎఫ్‌టీఎల్‌, బఫర్‌ జోన్ పరిధిలో ఉందా లేదా అనే అంశాన్ని సాంకేతిక పరిజ్ఞానంతో క్షుణ్ణంగా పరిశీలించాలని సూచించారు. అలాగే లేఔట్‌లలో అప్రోచ్ రోడ్లు, అంతర్గత రోడ్లు, వీధి దీపాలు, డ్రైనేజీ, సీవరేజ్‌, తాగునీరు, విద్యుత్ వంటి మౌలిక వసతులు ఉండేలా చూడాలని కలెక్టర్ పేర్కొన్నారు. గతంలో ఆ ప్రాంతంలో నీటి ప్రవాహ మార్గాలు లేదా నీటి వనరులు ఉన్నాయా అనే విషయాన్ని కూడా అధికారులు పరిశీలించాలని ఆదేశించారు. అనుమతులు ఇచ్చిన తర్వాత కూడా నిబంధనలకు అనుగుణంగా లేఔట్ అభివృద్ధి జరుగుతోందా లేదా అనే అంశంపై నిరంతర పర్యవేక్షణ ఉండాలని కలెక్టర్ సూచించారు. ఇప్పటికే సంయుక్త పరిశీలన అవసరమైన లేఔట్లకు సంబంధించిన జాయింట్ ఇన్‌స్పెక్షన్ రిపోర్టులను అక్టోబర్ 15లోగా సమర్పించాలని అధికారులను ఆదేశించారు.