మధ్యప్రదేశ్‌లో కల్తీ మద్యం కలకలం.. 12 మంది మృతి, 54 మంది అస్వస్థత

మధ్యప్రదేశ్‌లో కల్తీ మద్యం ఘటన తీవ్ర విషాదాన్ని మిగిల్చింది. సాగర్‌ జిల్లాలో కల్తీ మద్యం సేవించిన 12 మంది మృతి చెందగా.. మరో 54 మంది అస్వస్థతకు గురయ్యారు. ఆదివారం వెలుగులోకి వచ్చిన ఈ ఘటనపై రాష్ట్ర ప్రభుత్వం తీవ్రంగా స్పందించింది. సాగర్‌ జిల్లా బందా తహసీల్‌ పరిధిలోని పలు గ్రామాలకు చెందిన కొందరు వ్యక్తులు శనివారం రాత్రి మద్యం సేవించిన అనంతరం అస్వస్థతకు గురైనట్లు సమాచారం. పరిస్థితి విషమించడంతో బాధితులను ఆస్పత్రులకు తరలించారు. అయితే వారిలో 12 మంది అప్పటికే మృతి చెందినట్లు వైద్యులు నిర్ధారించినట్లు కాంగ్రెస్‌ మాజీ ఎమ్మెల్యే ఒకరు తెలిపారు. ప్రాథమిక సమాచారం ప్రకారం.. బాధితులు సేవించిన మద్యం ఉత్తర్‌ప్రదేశ్‌లోని లలిత్‌పూర్‌ నుంచి సరఫరా అయి ఉండొచ్చని అధికారులు అనుమానిస్తున్నారు. అయితే మద్యం కల్తీకి గురైందా? దాని మూలం ఏమిటి? అన్న అంశాలపై అధికారిక దర్యాప్తు కొనసాగుతోంది. ఈ ఘటనపై మధ్యప్రదేశ్‌ ముఖ్యమంత్రి మోహన్‌ యాదవ్‌ విచారణకు ఆదేశించారు. ఘటన జరిగిన ప్రాంతంలో ఉన్న ఏడు మద్యం దుకాణాలను అధికారులు మూసివేశారు. ఆయా దుకాణాల్లోని మద్యం నమూనాలను సేకరించి పరీక్షలకు పంపించారు. బాధ్యతారాహిత్యంపై చర్యల్లో భాగంగా ముగ్గురు ఎక్సైజ్‌ అధికారులతో పాటు ఇద్దరు పోలీసులను సస్పెండ్‌ చేసినట్లు అధికారులు వెల్లడించారు. ఘటనకు కారణమైన పరిస్థితులు, మద్యం సరఫరా వ్యవస్థపై దర్యాప్తు కొనసాగుతోంది. మరోవైపు ఈ ఘటనపై కాంగ్రెస్‌ ప్రభుత్వం, అధికార యంత్రాంగంపై విమర్శలు చేసింది. కల్తీ మద్యం ఘటనపై న్యాయ విచారణ జరిపించాలని మధ్యప్రదేశ్‌ కాంగ్రెస్‌ అధ్యక్షుడు జితు పట్వారీ డిమాండ్‌ చేశారు. కల్తీ మద్యం కారణంగా పెద్ద సంఖ్యలో ప్రాణనష్టం సంభవించడంతో సాగర్‌ జిల్లాలో ఆందోళనకర పరిస్థితి నెలకొంది. మద్యం నమూనాల పరీక్షలు, పోలీసు దర్యాప్తు పూర్తయిన తర్వాత ప్రమాదానికి అసలు కారణం, కల్తీ మద్యం సరఫరా వెనుక ఉన్న వ్యక్తుల వివరాలు వెలుగులోకి వచ్చే అవకాశం ఉంది.