మంచిర్యాల: అదనపు కట్నం వేధింపుల ఆరోపణలు.. భార్య ముక్కు కొరికిన భర్త

మంచిర్యాల జిల్లా కోటపల్లి మండల కేంద్రంలో భార్యాభర్తల మధ్య జరిగిన గొడవ తీవ్ర రూపం దాల్చింది. అదనపు కట్నం కోసం కొంతకాలంగా వేధింపులకు గురిచేస్తున్నారన్న కుటుంబ సభ్యుల ఆరోపణల నేపథ్యంలో.. భర్త తన భార్య మమతపై దాడికి పాల్పడినట్లు సమాచారం. కోటపల్లికి చెందిన మమతకు అదే మండలంలోని మల్లంపేట గ్రామానికి చెందిన ఎనగందుల మణిచందర్‌తో తొమ్మిదేళ్ల క్రితం వివాహం జరిగింది. ఈ దంపతులకు ఇద్దరు కుమార్తెలు ఉన్నారు. గత నాలుగేళ్లుగా అదనపు కట్నం కోసం మణిచందర్ తన భార్యను వేధిస్తున్నాడని మమత కుటుంబ సభ్యులు ఆరోపించారు. మద్యానికి బానిసైన ఆయన తరచూ కట్నం విషయమై గొడవ చేసేవాడని తెలిపారు. సుమారు పది రోజుల క్రితం భార్యాభర్తల మధ్య మరోసారి గొడవ జరగడంతో మమత తన ఇద్దరు కుమార్తెలతో కలిసి తల్లిదండ్రుల ఇంటికి వెళ్లింది. ఈ క్రమంలో మణిచందర్ తన కుటుంబ సభ్యులతో కలిసి కోటపల్లిలోని మమత తల్లిదండ్రుల ఇంటికి వెళ్లి గొడవకు దిగినట్లు కుటుంబ సభ్యులు తెలిపారు. మమత తండ్రి నారాయణపై దాడికి ప్రయత్నించగా.. అడ్డుకునేందుకు వెళ్లిన మమతను మణిచందర్ తీవ్రంగా గాయపరిచినట్లు సమాచారం. ఈ ఘటనలో ఆమె ముక్కుకు తీవ్ర గాయమవడంతో కుటుంబ సభ్యులు వెంటనే వరంగల్ ఎంజీఎం ఆసుపత్రికి తరలించారు. ఈ ఘటనపై కోటపల్లి పోలీసులు కేసు నమోదు చేసినట్లు ఎస్సై రాజశేఖర్ తెలిపారు. ఘటనకు సంబంధించిన పూర్తి వివరాలు, కేసు దర్యాప్తులో వెల్లడికావాల్సి ఉంది.