ఫోన్ చోరీ చేశాడనే అనుమానంతో దాడి.. వ్యక్తి మృతి

వెల్దుర్తి, సెప్టెంబరు 30:** సెల్‌ఫోన్ చోరీ చేశాడనే అనుమానంతో ఓ వ్యక్తిపై కొందరు దాడి చేయడంతో అతడు మృతి చెందిన ఘటన మెదక్‌ జిల్లా వెల్దుర్తి మండలంలో చోటుచేసుకుంది. మన్నెవారి జలాల్‌పూర్‌ గ్రామంలో మంగళవారం అర్ధరాత్రి ఈ ఘటన జరిగినట్లు పోలీసులు తెలిపారు. గ్రామానికి చెందిన గుండెని ప్రవీణ్‌ వినాయక నిమజ్జనం రోజున తన సెల్‌ఫోన్‌ పోగొట్టుకున్నాడు. ఆ ఫోన్‌ను గ్రామానికి చెందిన బ్యాగరి రామానుజం (40) తీసుకున్నాడనే అనుమానంతో ప్రవీణ్‌, అతడి కుటుంబసభ్యులు, మరికొందరు కలిసి రామానుజంపై దాడి చేసినట్లు పోలీసులు వెల్లడించారు. దాడిలో తీవ్రంగా గాయపడిన రామానుజం సంఘటనా స్థలంలోనే మృతి చెందాడు. సమాచారం అందుకున్న పోలీసులు మృతదేహాన్ని పోస్టుమార్టం నిమిత్తం ఆస్పత్రికి తరలించారు. ఘటన నేపథ్యంలో గ్రామంలో ఎలాంటి అవాంఛనీయ పరిస్థితులు తలెత్తకుండా ముందస్తుగా పోలీసు బందోబస్తు ఏర్పాటు చేశారు. మృతుడు రామానుజానికి భార్య రజితతో పాటు ముగ్గురు కుమార్తెలు ఉన్నారు. ఘటనపై కేసు నమోదు చేసి దర్యాప్తు చేస్తున్నట్లు తూప్రాన్‌ సీఐ వెంకటరాజాగౌడ్‌ తెలిపారు. ఫోన్‌ చోరీకి సంబంధించిన అనుమానం నిజమా కాదా, దాడిలో ఎవరి పాత్ర ఎంతవరకు ఉందనే అంశాలను దర్యాప్తులో పోలీసులు పరిశీలించనున్నారు.