ఇతర నాయకులు నేర్చుకోవాలి.. నారా లోకేశ్ ఇంటర్వ్యూతీరుపై రాజ్‌దీప్ సర్దేశాయ్ ప్రశంసలు

అమరావతి, అక్టోబర్ 1: ఆంధ్రప్రదేశ్ మంత్రి, టీడీపీ జాతీయ ప్రధాన కార్యదర్శి నారా లోకేశ్‌తో నిర్వహించిన ముఖాముఖి ఇంటర్వ్యూపై సీనియర్ జర్నలిస్ట్, ఇండియా టుడే కన్సల్టింగ్ ఎడిటర్ రాజ్‌దీప్ సర్దేశాయ్ స్పందించారు. కొచ్చిలో జరిగిన ఇండియా టుడే కాంక్లేవ్ సౌత్ 2026 సందర్భంగా వీరిద్దరి మధ్య ఈ సంభాషణ జరిగింది. ఏపీ అభివృద్ధి, ఉద్యోగాల కల్పన, విద్యా సంస్కరణలు, జాతీయ రాజకీయాలు, ఎన్నికల వ్యవస్థకు సంబంధించిన అంశాలపై రాజ్‌దీప్ ప్రశ్నలు సంధించగా.. లోకేశ్ వాటికి సమాధానాలు ఇచ్చారు. ఇంటర్వ్యూ సందర్భంగా నారా లోకేశ్ వ్యవహరించిన తీరును రాజ్‌దీప్ సర్దేశాయ్ ప్రశంసించారు. ముఖ్యంగా ముందస్తుగా ప్రశ్నలు పంపాలని కోరని, ప్రత్యక్షంగా ప్రశ్నలు ఎదుర్కొనే నాయకులతో సంభాషణ జరపడం జర్నలిస్టులకు సులభంగా ఉంటుందని ఆయన వ్యాఖ్యానించారు. గతంలో రాజకీయ నాయకుల్లో ఇలాంటి విధానం సాధారణంగా ఉండేదని, ప్రస్తుతం మాత్రం అది మినహాయింపుగా మారిందని పేర్కొంటూ.. ఇతర నాయకులు కూడా లోకేశ్‌ను చూసి నేర్చుకోవాలని అన్నారు. ఈ ఇంటర్వ్యూలో రాజ్‌దీప్ సర్దేశాయ్ పలు క్లిష్టమైన ప్రశ్నలను ప్రస్తావించారు. ముఖ్యంగా ఎన్నికల సంఘం, ఎస్‌ఐఆర్‌ (Special Intensive Revision), టీడీపీ–ఎన్‌డీఏ సంబంధాలు, ఏపీ అభివృద్ధి, యువతకు ఉద్యోగాల కల్పన వంటి అంశాలు చర్చకు వచ్చాయి. ఎన్నికల వ్యవస్థపై విమర్శలు, దాని పనితీరుపై రాజకీయ పార్టీల వైఖరిపై కూడా లోకేశ్ తన అభిప్రాయాలను వెల్లడించారు. అదే సమయంలో ఏపీ ప్రభుత్వం యువతకు ఉద్యోగాల కల్పనకు ప్రాధాన్యం ఇస్తోందని లోకేశ్ తెలిపారు. 20 లక్షల ఉద్యోగాల కల్పన లక్ష్యంగా పెట్టుకున్నామని, పెట్టుబడులను ఆకర్షించడం, పరిశ్రమలకు అనుగుణంగా విద్యా విధానాన్ని మార్చడం, కొత్త టెక్నాలజీలకు అనుగుణంగా యువతను సిద్ధం చేయడంపై దృష్టి పెట్టినట్లు చెప్పారు. మొత్తంగా ఈ ముఖాముఖి సందర్భంగా రాష్ట్ర అభివృద్ధి నుంచి జాతీయ రాజకీయాల వరకు పలు అంశాలు చర్చకు వచ్చాయి. ఇంటర్వ్యూలో లోకేశ్ స్పందించిన తీరుపై రాజ్‌దీప్ చేసిన వ్యాఖ్యలు ఇప్పుడు రాజకీయ, మీడియా వర్గాల్లో చర్చకు దారితీశాయి. మరోవైపు, ముందస్తు ప్రశ్నలు లేకుండానే ఇంటర్వ్యూలో పాల్గొన్నట్లు లోకేశ్ కూడా పేర్కొన్నారు.