చేతబడి అనుమానం.. వ్యక్తి హత్యతో గజపతి జిల్లాలో కలకలం

ఒడిశాలోని గజపతి జిల్లాలో చేతబడి చేస్తున్నాడనే అనుమానంతో ఓ వ్యక్తి హత్యకు గురైన ఘటన కలకలం రేపింది. మోహన పోలీస్‌ స్టేషన్‌ పరిధిలోని మేరమా గ్రామానికి చెందిన రామచంద్ర మాలిక్‌ (41) ఈ ఘటనలో మృతి చెందారు. ఈ కేసుకు సంబంధించి 12 మందిని అరెస్ట్ చేసినట్లు ఆర్. ఉదయగిరి ఎస్డీపీవో రాకేష్ కుమార్ సాహు వెల్లడించారు. పోలీసుల వివరాల ప్రకారం.. రామచంద్ర మాలిక్‌ గ్రామానికి సుమారు రెండున్నర కిలోమీటర్ల దూరంలోని ఓ కొండపై గుడిసెలో నివసిస్తూ నాటు వైద్యం చేసేవారు. ఇటీవల గ్రామానికి చెందిన ఓ మహిళ, రెండు నెలల పసికందు మృతి చెందారు. ఈ మరణాలకు రామచంద్ర చేస్తున్నాడని భావించిన కొందరు గ్రామస్థులు అనుమానం వ్యక్తం చేసినట్లు పోలీసులు తెలిపారు. ఈ నేపథ్యంలో గ్రామంలో సమావేశం నిర్వహించిన అనంతరం రామచంద్రపై దాడి జరిగినట్లు ఆరోపణలు ఉన్నాయి. సమాచారం అందుకున్న పోలీసులు ఘటనా స్థలానికి చేరుకుని దర్యాప్తు చేపట్టారు. పోలీసులతో పాటు సైంటిఫిక్ బృందం కూడా అక్కడి పరిసరాలను పరిశీలించింది. ఈ ఘటనకు సంబంధించి తొలుత కొందరిని అదుపులోకి తీసుకుని విచారించిన పోలీసులు.. దర్యాప్తు అనంతరం మొత్తం 12 మందిని అరెస్ట్ చేసినట్లు తెలిపారు. ఘటన వెనుక ఉన్న కారణాలు, దాడిలో ఎవరి పాత్ర ఎంతమేర ఉందనే అంశాలపై దర్యాప్తు కొనసాగుతోంది.