రాజోలు: 15వ రోజుకు చేరిన వీఆర్ఏల సహాయ నిరాకరణ ఉద్యమం

డాక్టర్ బీఆర్ అంబేడ్కర్ కోనసీమ జిల్లా రాజోలులో వీఆర్ఏల సహాయ నిరాకరణ ఉద్యమం 15వ రోజుకు చేరింది. తమ సమస్యలను ప్రభుత్వం దృష్టికి తీసుకెళ్లేందుకు వీఆర్ఏలు రాజోలు తహసీల్దార్ కార్యాలయం వద్ద నిరసన చేపట్టారు. నిరసనలో భాగంగా కొందరు వీఆర్ఏలు మెడలకు ఉరి తాళ్లు వేసుకుని తమ సమస్యల తీవ్రతను తెలియజేసే ప్రయత్నం చేశారు. ఇదే సమయంలో ఓ వృద్ధ వీఆర్ఏ తీవ్ర ఆవేదనకు గురై సొమ్మసిల్లి పడిపోవడంతో తోటి వీఆర్ఏలు వెంటనే స్పందించి ప్రథమ చికిత్స అందించారు. దీంతో అక్కడ కొద్దిసేపు ఉద్రిక్త పరిస్థితి నెలకొంది. ప్రస్తుతం పెరుగుతున్న నిత్యావసరాల ధరల నేపథ్యంలో రూ.10,500 వేతనంతో కుటుంబాలను పోషించడం కష్టంగా మారిందని వీఆర్ఏలు ఆవేదన వ్యక్తం చేశారు. ఎన్నో ఏళ్లుగా ప్రభుత్వ సేవల్లో పనిచేస్తున్నప్పటికీ తమ సమస్యలకు శాశ్వత పరిష్కారం లభించలేదని పేర్కొన్నారు. వీఆర్ఏలకు పే స్కేల్ అమలు చేయాలని, అర్హత ఉన్న వారికి వీఆర్వోలుగా పదోన్నతులు కల్పించాలని, నామినీ వీఆర్ఏలను రెగ్యులర్ చేయాలని వారు ప్రధానంగా డిమాండ్ చేస్తున్నారు. ప్రభుత్వం తమ డిమాండ్లపై వెంటనే సానుకూలంగా స్పందించాలని వీఆర్ఏల సంఘం కోరింది. సమస్యల పరిష్కారంపై స్పష్టమైన నిర్ణయం రాకపోతే ఆందోళనను మరింత ఉధృతం చేస్తామని వీఆర్ఏలు హెచ్చరించారు.