రూ.100 Coin: మోధేరా సూర్య దేవాలయానికి వెయ్యేళ్లు.. ప్రత్యేక రూ.100 స్మారక నాణెం

Rs 100 Coin: గుజరాత్‌లోని ప్రసిద్ధ మోధేరా సూర్య దేవాలయం నిర్మాణానికి వెయ్యేళ్లు పూర్తవుతున్న సందర్భంగా కేంద్ర ప్రభుత్వం ప్రత్యేక రూ.100 స్మారక నాణేన్ని విడుదల చేయనుంది. ఈ మేరకు కేంద్ర ఆర్థిక శాఖ శుక్రవారం అధికారిక గెజిట్ నోటిఫికేషన్ జారీ చేసింది. కాయినేజ్ యాక్ట్, 2011 కింద రూపొందించిన నిబంధనల ద్వారా ఈ స్మారక నాణెం విడుదలకు సంబంధించిన వివరాలను ప్రభుత్వం ప్రకటించింది. కొత్త రూ.100 నాణెం రెండు వైపులా ప్రత్యేకమైన డిజైన్‌తో రూపొందించారు. ముందు భాగంలో మధ్యలో అశోక చక్రం ఉంటుంది. దాని కింద దేవనాగరి లిపిలో ‘సత్యమేవ జయతే’ అని ముద్రిస్తారు. ఎడమవైపు దేవనాగరిలో ‘భారత్’, కుడివైపు ఆంగ్లంలో ‘INDIA’ అనే పదాలు ఉంటాయి. అంతర్జాతీయ సంఖ్యల్లో ‘100’తో పాటు రూపాయి చిహ్నం కూడా నాణెంపై కనిపిస్తుంది. నాణెం వెనుక భాగంలో మోధేరా సూర్య దేవాలయ ప్రధాన నిర్మాణాన్ని ప్రతిబింబించే శిల్పాకృతి ఉంటుంది. ఆలయ చిత్రానికి పైభాగంలో ‘1026-2026’ సంవత్సరాలను ముద్రించనున్నారు. కింది భాగంలో “1000 YEARS OF MODHERA SUN TEMPLE, GUJARAT” అనే వాక్యం ఉంటుంది. దీంతో ఆలయ వెయ్యేళ్ల చరిత్రను స్మారక నాణెం ద్వారా గుర్తించనున్నారు. వెయ్యేళ్ల చరిత్రకు గుర్తుగా.. గుజరాత్‌లోని మెహసానా జిల్లాలో ఉన్న మోధేరా సూర్య దేవాలయం భారతీయ ఆలయ శిల్పకళలో ప్రత్యేక స్థానాన్ని కలిగి ఉంది. సోలంకి కాలానికి చెందిన ఈ ఆలయ నిర్మాణంలో రాతి శిల్పాలు, నిర్మాణ నైపుణ్యం, సూర్యారాధనకు సంబంధించిన ప్రత్యేక రూపకల్పన ప్రధాన ఆకర్షణలుగా నిలుస్తాయి. ఆలయ సముదాయంలోని సూర్యకుండ్ కూడా ప్రత్యేక ప్రాధాన్యత కలిగిన నిర్మాణం. మెట్లతో కూడిన ఈ విశాల జల నిర్మాణం చుట్టూ అనేక చిన్న ఆలయాలు, శిల్పాలు కనిపిస్తాయి. మోధేరా ఆలయ నిర్మాణ శైలి, శిల్ప సంపద భారతదేశ ప్రాచీన వాస్తు, కళా వైభవానికి ప్రతీకగా నిలిచింది. ఈ నేపథ్యంలో మోధేరా సూర్య దేవాలయం నిర్మాణానికి వెయ్యేళ్లు పూర్తవుతున్న సందర్భంగా విడుదల చేయనున్న రూ.100 స్మారక నాణెం.. ఆలయ చారిత్రక ప్రాధాన్యతను గుర్తుచేసే ప్రత్యేక జ్ఞాపికగా నిలవనుంది.