నోయల్‌ టాటా వర్సెస్‌ వేణు శ్రీనివాసన్‌.. టాటా ట్రస్టుల్లో ముదిరిన విభేదాలు

ముంబై: టాటా సన్స్‌, టాటా ట్రస్టుల మధ్య కొనసాగుతున్న విభేదాలు మరో కీలక మలుపు తీసుకున్నాయి. సర్‌ దొరాబ్జీ టాటా ట్రస్ట్‌ (SDTT) ట్రస్టీ, టాటా సన్స్‌ బోర్డులో ట్రస్టుల తరఫున నామినీ డైరెక్టర్‌గా ఉన్న వేణు శ్రీనివాసన్‌.. ట్రస్ట్‌ పాలన, నిర్ణయ ప్రక్రియపై మహారాష్ట్ర చారిటీ కమిషనర్‌ను ఆశ్రయించారు. ట్రస్ట్‌ పాలనలో కొన్ని అంశాలపై దర్యాప్తు జరపాలని కోరుతూ ఆయన ఫిర్యాదు చేశారు. తన ఫిర్యాదులో శ్రీనివాసన్‌.. టాటా ట్రస్టులు, వాటి ట్రస్టీలు టాటా సన్స్‌ వాణిజ్య, వ్యూహాత్మక వ్యవహారాల్లో అధికంగా జోక్యం చేసుకుంటున్నారనే ఆరోపణలు చేశారు. ముఖ్యంగా టాటా సన్స్‌ బోర్డులో నామినీ డైరెక్టర్‌గా తన స్వతంత్ర నిర్ణయాధికారాన్ని పరిమితం చేసే ప్రయత్నాలు జరిగాయని ఆయన పేర్కొన్నారు. అయితే ఇవన్నీ శ్రీనివాసన్‌ చేసిన ఆరోపణలేనని, వాటిపై సంబంధిత అధికారుల విచారణ అనంతరం వాస్తవాలు స్పష్టమవుతాయని గమనించాలి. అంతేకాకుండా టాటా ట్రస్టుల చైర్మన్‌ నోయల్‌ టాటా శాశ్వత ట్రస్టీగా కొనసాగుతున్న తీరు, ఆయన చైర్మన్‌ పదవికి సంబంధించిన అంశాలు, ఆయన కుమారుడు నెవిల్లే టాటా నియామకం వంటి విషయాలపైనా శ్రీనివాసన్‌ ప్రశ్నలు లేవనెత్తారు. ట్రస్ట్‌ నిర్ణయ ప్రక్రియలో తనకు తగిన భాగస్వామ్యం కల్పించలేదని కూడా ఆయన ఆరోపించారు. టాటా సన్స్‌ వ్యవహారాలే కీలక అంశం ప్రస్తుత వివాదానికి ప్రధాన నేపథ్యం టాటా సన్స్‌ భవిష్యత్‌ పాలన, వ్యూహాత్మక నిర్ణయాల చుట్టూ ఏర్పడిన విభేదాలే. టాటా ట్రస్టులకు టాటా సన్స్‌లో 66 శాతం వాటా ఉంది. ఈ నేపథ్యంలో మెజారిటీ వాటాదారులుగా ట్రస్టుల పాత్ర ఎంతవరకు ఉండాలి? టాటా సన్స్‌ బోర్డు స్వతంత్రంగా తీసుకునే నిర్ణయాల్లో ట్రస్టుల ప్రభావానికి ఉన్న పరిమితులు ఏమిటి? అన్న అంశాలు ప్రాధాన్యం సంతరించుకున్నాయి. మరోవైపు, టాటా సన్స్‌ చైర్మన్‌ ఎన్‌. చంద్రశేఖరన్‌ పునర్నియామకం, టాటా సన్స్‌ భవిష్యత్‌ లిస్టింగ్‌ లేదా దాని ప్రత్యామ్నాయాలపై కూడా టాటా ట్రస్టులు, టాటా సన్స్‌ మధ్య విభేదాలు కొనసాగుతున్నాయి. ఈ నేపథ్యంలో ట్రస్టుల అంతర్గత విభేదాలు మరింత బహిరంగ రూపం దాల్చడం ప్రస్తుత పరిణామాలకు ప్రాధాన్యం కల్పిస్తోంది. నోయల్‌, నెవిల్లే టాటాల కేవియట్‌ వేణు శ్రీనివాసన్‌ ఫిర్యాదుపై మహారాష్ట్ర చారిటీ కమిషనర్‌ ఎలాంటి మధ్యంతర ఆదేశాలు జారీ చేసే ముందు తమ వాదనను కూడా వినాలని కోరుతూ నోయల్‌ టాటా, నెవిల్లే టాటాల తరఫున చర్యలు తీసుకున్నారు. తాజా నివేదికల ప్రకారం, ఫిర్యాదుపై తమ వాదన వినాలని కోరుతూ టాటా ట్రస్టులు చారిటీ కమిషనర్‌ను ఆశ్రయించాయి. కేవియట్‌ దాఖలు చేసే ప్రక్రియపై కూడా న్యాయపరమైన పరిశీలన జరుగుతున్నట్లు సమాచారం. ఇలా ఒకవైపు ట్రస్ట్‌ పాలనపై దర్యాప్తు కోరుతూ వేణు శ్రీనివాసన్‌ ముందుకు రావడం, మరోవైపు ఫిర్యాదుపై తమ వాదనను వినాలని నోయల్‌ టాటా వర్గం కోరడం.. టాటా ట్రస్టుల్లో అంతర్గత పాలన, టాటా సన్స్‌తో సంబంధాలపై ఉన్న విభేదాలను మరింత స్పష్టంగా బయటపెడుతున్నాయి. ఈ వ్యవహారంలో మహారాష్ట్ర చారిటీ కమిషనర్‌ తీసుకునే తదుపరి చర్యలు కీలకంగా మారనున్నాయి.