తిరువూరులో కార్యకర్తలకే అభివృద్ధి పనులు.. ఎమ్మెల్యే కొలికపూడి కీలక నిర్ణయం

ఎన్టీఆర్ జిల్లా, సెప్టెంబర్ 19: తిరువూరు నియోజకవర్గంలో అభివృద్ధి పనుల విషయంలో ఎమ్మెల్యే కొలికపూడి శ్రీనివాసరావు కొత్త విధానానికి శ్రీకారం చుట్టారు. సాధారణంగా పెద్ద కాంట్రాక్టర్లకు దక్కే అభివృద్ధి పనుల్లో స్థానికంగా పార్టీ కోసం పనిచేస్తున్న కార్యకర్తలకు కూడా అవకాశం కల్పించాలని నిర్ణయించారు. ‘కార్యకర్తే కాంట్రాక్టర్’ అనే విధానంతో నియోజకవర్గంలో చేపట్టే కొన్ని అభివృద్ధి పనులను పార్టీ కార్యకర్తలకు అప్పగించే ప్రక్రియను ప్రారంభించారు. ఈ క్రమంలో అధికారుల సమక్షంలో దాదాపు రూ.10 కోట్ల విలువైన అభివృద్ధి పనులకు సంబంధించిన వర్క్ ఆర్డర్ కాపీలను కార్యకర్తలకు ఎమ్మెల్యే అందజేశారు. కష్టకాలంలో పార్టీకి అండగా నిలిచిన క్షేత్రస్థాయి కార్యకర్తలకు ప్రాధాన్యం ఇవ్వాలన్న ఉద్దేశంతో ఈ నిర్ణయం తీసుకున్నట్లు కొలికపూడి శ్రీనివాసరావు తెలిపారు. అభివృద్ధి పనుల్లో పార్టీ కేడర్‌ను భాగస్వామ్యం చేయడం ద్వారా వారికి ఆర్థికంగా కూడా అవకాశం కల్పించాలన్నది ఈ విధానం లక్ష్యంగా కనిపిస్తోంది. ఇదే కార్యక్రమంలో భాగంగా పార్టీ కోసం నిరంతరం పనిచేసిన కొంతమంది కార్యకర్తలకు బజాజ్ ప్లాటినా బైక్‌లను ఉచితంగా అందజేశారు. పార్టీ కార్యకర్తలే తమకు వెన్నెముక అని ఎమ్మెల్యే పేర్కొన్నారు.