తిరువూరులో ఫోన్ చోరీ.. వెంటనే రూ.లక్ష బదిలీ

ఎన్టీఆర్ జిల్లా, తిరువూరు: తిరువూరులోని ఓ చెప్పుల దుకాణంలో మొబైల్‌ ఫోన్‌ చోరీకి గురైన ఘటన కలకలం రేపింది. చోరీ చేసిన ఫోన్‌ నుంచే వెంటనే రూ.లక్ష నగదు బదిలీ కావడం ఈ ఘటనలో కీలకంగా మారింది. పోలీసులు సీసీ కెమెరాల ఆధారంగా నిందితుల కదలికలపై దర్యాప్తు చేస్తున్నారు. తిరువూరులోని గుర్రం జగన్మోహన్‌రావుకు చెందిన చెప్పుల దుకాణానికి ఓ యువకుడు వచ్చాడు. ఫోన్‌ కావాలంటూ దుకాణ యజమానితో మాటలు కలిపిన అతడు.. చెప్పులు తీసుకొచ్చేలోపు మొబైల్‌ ఫోన్‌తో అక్కడి నుంచి వెళ్లిపోయినట్లు సమాచారం. ఫోన్‌ కనిపించకపోవడంతో యజమాని పరిశీలించగా అది చోరీకి గురైనట్లు గుర్తించారు. అయితే ఘటన జరిగిన వెంటనే ఆ ఫోన్‌ నుంచే రూ.లక్ష బదిలీ అయినట్లు గుర్తించడం మరింత ఆందోళన కలిగించింది. దీంతో బాధితులు పోలీసులను ఆశ్రయించారు. మరోవైపు, హెల్మెట్‌ ధరించి దుకాణానికి వచ్చిన వ్యక్తి కదలికలు సీసీ కెమెరాల్లో నమోదయ్యాయి. అనంతరం మరో వ్యక్తితో కలిసి బైక్‌పై అక్కడి నుంచి వెళ్లిన దృశ్యాలు కూడా పోలీసులకు లభించినట్లు తెలుస్తోంది. సీసీ ఫుటేజ్‌, నగదు బదిలీ వివరాల ఆధారంగా నిందితులను గుర్తించే పనిలో పోలీసులు ఉన్నారు.