World Billionaires List: 18 ఏళ్లు నంబర్ వన్.. ఇప్పుడు బిల్ గేట్స్ ర్యాంక్ ఎంతో తెలుసా?

ప్రపంచ కుబేరుల జాబితా అంటే ముందుగా గుర్తొచ్చే పేర్లలో మైక్రోసాఫ్ట్ సహ వ్యవస్థాపకుడు బిల్ గేట్స్ ఒకరు. ఒకప్పుడు ప్రపంచంలోనే అత్యంత ధనవంతుడిగా సుదీర్ఘకాలం కొనసాగిన ఆయన.. ఇప్పుడు అదే జాబితాలో 18వ స్థానానికి చేరుకున్నారు. మరోవైపు టెస్లా, స్పేస్‌ఎక్స్ వంటి సంస్థల అధినేత ఎలాన్ మస్క్ ప్రపంచ కుబేరుల జాబితాలో అగ్రస్థానంలో కొనసాగుతున్నారు. ఫోర్బ్స్ రియల్‌టైమ్ బిలియనీర్స్ జాబితా ప్రకారం.. ఎలాన్ మస్క్ నికర సంపద 946.5 బిలియన్ డాలర్లుగా ఉంది. ఈ ఏడాది ఆయన ప్రపంచంలోనే తొలి ట్రిలియనీర్‌గా నిలిచినట్లు కూడా ఈ కథనం పేర్కొంటోంది. బిల్ గేట్స్ ఆధిపత్యం ప్రపంచంలోనే అత్యంత ధనవంతుడిగా అత్యధిక కాలం కొనసాగిన వ్యక్తిగా బిల్ గేట్స్ పేరు నిలిచింది. 1995లో తొలిసారిగా ఫోర్బ్స్ ప్రపంచ బిలియనీర్ల జాబితాలో అగ్రస్థానానికి చేరుకున్న ఆయన.. 2007 వరకు వరుసగా కొనసాగారు. అయితే ఈ స్థానంలో ఆయన ప్రయాణం నిరంతరంగా సాగలేదు. 2008లో వారెన్ బఫెట్ బిల్ గేట్స్‌ను అధిగమించారు. 2009లో గేట్స్ మళ్లీ నంబర్ వన్ స్థానాన్ని దక్కించుకున్నారు. ఆ తర్వాత 2010లో మెక్సికోకు చెందిన కార్లోస్ స్లిమ్, ఆయన కుటుంబం అగ్రస్థానంలోకి వచ్చారు. 2014లో బిల్ గేట్స్ మరోసారి ప్రపంచంలోనే అత్యంత ధనవంతుడిగా నిలిచి.. 2017 వరకు ఆ స్థానాన్ని కొనసాగించారు. 2018లో అమెజాన్ వ్యవస్థాపకుడు జెఫ్ బెజోస్ ఆయనను అధిగమించారు. బెజోస్ 2021 వరకు నంబర్ వన్‌గా కొనసాగగా.. 2022లో ఎలాన్ మస్క్ ఆ స్థానాన్ని దక్కించుకున్నారు. 2023లో ఫ్రెంచ్ వ్యాపారవేత్త బెర్నార్డ్ ఆర్నాల్ట్, ఆయన కుటుంబం మస్క్‌ను అధిగమించారు. 2024లోనూ వారు అగ్రస్థానంలో ఉన్నారు. ఆ తర్వాతి కాలంలో ఎలాన్ మస్క్ తిరిగి నంబర్ వన్ స్థానాన్ని సొంతం చేసుకున్నారు. ఇప్పుడు బిల్ గేట్స్ స్థానం ఎంత? ఒకప్పుడు ప్రపంచ కుబేరుల జాబితాలో అగ్రస్థానంలో ఉన్న బిల్ గేట్స్.. ప్రస్తుతం 114.3 బిలియన్ డాలర్ల నికర సంపదతో 18వ స్థానంలో ఉన్నారు. ఇక 373.1 బిలియన్ డాలర్ల సంపదతో జెఫ్ బెజోస్ రెండో స్థానంలో ఉన్నారు. 144.6 బిలియన్ డాలర్లతో వారెన్ బఫెట్ 10వ స్థానంలో ఉండగా.. 125.2 బిలియన్ డాలర్లతో బెర్నార్డ్ ఆర్నాల్ట్, ఆయన కుటుంబం 14వ స్థానంలో ఉన్నాయి. 119.1 బిలియన్ డాలర్ల సంపదతో కార్లోస్ స్లిమ్ 15వ స్థానంలో కొనసాగుతున్నారు. ఈ గణాంకాలు చూస్తే ప్రపంచ కుబేరుల జాబితాలో స్థానాలు ఎంత వేగంగా మారుతున్నాయో స్పష్టమవుతోంది. కంపెనీల మార్కెట్ విలువలు, షేర్ ధరలు, పెట్టుబడులు, ఆస్తుల విలువల్లో మార్పులు వంటి అంశాల ఆధారంగా ఈ ర్యాంకింగ్స్ కూడా మారుతూ ఉంటాయి.