RTI దరఖాస్తుల దుర్వినియోగంపై సమాచార కమిషన్ కీలక ఆదేశాలు.. పునరావృత దరఖాస్తులపై స్పష్టత

Misuse of RTI Applications: సమాచార హక్కు చట్టం (RTI)ను పదేపదే, ఒకే అంశంపై పునరావృతంగా ఉపయోగించడంపై ఆంధ్రప్రదేశ్ సమాచార కమిషన్ కీలక వ్యాఖ్యలు చేసింది. బి.గోపాల్ అనే దరఖాస్తుదారు దాఖలు చేసిన 102 ఆర్టీఐ కేసులను ఒకే బ్యాచ్‌గా స్వీకరించిన కమిషన్.. విచారణ సందర్భంగా ఆర్టీఐ చట్టం పరిధి, ప్రజా సమాచార అధికారుల బాధ్యతలు, దరఖాస్తుదారుల హక్కులపై స్పష్టత ఇచ్చింది. ఒకే అంశంపై పదేపదే దరఖాస్తులు వద్దు ఇప్పటికే ఒక అంశానికి సంబంధించి సమాచారం అందించిన తర్వాత.. అదే సమాచారాన్ని కోరుతూ మళ్లీ మళ్లీ ఆర్టీఐ దరఖాస్తులు, అప్పీళ్లు దాఖలు చేయడం సరికాదని కమిషన్ అభిప్రాయపడింది. ఇలాంటి పునరావృత దరఖాస్తుల వల్ల ప్రభుత్వ కార్యాలయాలపై అదనపు భారం పడటంతో పాటు.. అధికారుల సాధారణ విధులకు కూడా ఆటంకం కలిగే అవకాశం ఉందని పేర్కొంది. ఒకే అంశంపై సమాచారం ఇప్పటికే అందుబాటులో ఉన్నప్పటికీ, దానినే తిరిగి కోరుతూ వరుసగా దరఖాస్తులు దాఖలు చేయడం ఆర్టీఐ చట్టం ఉద్దేశానికి అనుగుణంగా ఉండదని కమిషన్ స్పష్టం చేసింది. రికార్డుల్లో ఉన్న సమాచారానికే RTI ఆర్టీఐ చట్టం పరిధిపై కూడా సమాచార కమిషన్ కీలక వివరణ ఇచ్చింది. ప్రభుత్వ రికార్డుల్లో ఇప్పటికే అందుబాటులో ఉన్న సమాచారాన్ని పొందే హక్కును చట్టం కల్పిస్తుందని పేర్కొంది. అయితే దరఖాస్తుదారు కోరిన విధంగా కొత్త సమాచారాన్ని సృష్టించడం, ఉన్న డేటాను విశ్లేషించడం లేదా ప్రత్యేకంగా నివేదికలు తయారు చేయడం ప్రజా సమాచార అధికారుల బాధ్యత కాదని స్పష్టం చేసింది. అంటే.. ప్రభుత్వ రికార్డుల్లో ఉన్న సమాచారాన్ని కోరడం ఆర్టీఐ పరిధిలోకి వస్తుంది. కానీ ఆ రికార్డులను విశ్లేషించి కొత్తగా సమాధానం రూపొందించాలని లేదా ప్రత్యేక నివేదిక తయారు చేయాలని అధికారులను కోరడం మాత్రం ఆర్టీఐ కింద తప్పనిసరి కాదన్నది కమిషన్ తాజా ఆదేశాల సారాంశంగా కనిపిస్తోంది. RTI ఉద్దేశం.. అధికారులపై అదనపు భారం కాదు సమాచార హక్కు చట్టం పారదర్శకత, జవాబుదారీతనాన్ని పెంచేందుకు ఉద్దేశించినదే అయినప్పటికీ.. దాని వినియోగం కూడా చట్ట పరిధిలోనే ఉండాలని ఈ వ్యవహారం స్పష్టం చేస్తోంది. ముఖ్యంగా ఒకే అంశంపై పునరావృత దరఖాస్తులు దాఖలు చేయడం ద్వారా ప్రభుత్వ యంత్రాంగంపై అనవసరమైన పని భారం పడకుండా చూడాల్సిన అవసరాన్ని కమిషన్ వ్యాఖ్యలు సూచిస్తున్నాయి.