ఏలూరు: అక్టోబర్ పింఛన్ల పంపిణీకి ఏర్పాట్లు పూర్తి

ఏలూరు జిల్లాలో అక్టోబర్ నెల పింఛన్ల పంపిణీకి అధికారులు అన్ని ఏర్పాట్లు పూర్తి చేశారు. జిల్లాలో మొత్తం 2,53,360 మంది పింఛనుదారులకు రూ.111.69 కోట్లను పంపిణీ చేయనున్నట్లు జిల్లా కలెక్టర్ కె. వెట్రిసెల్వి తెలిపారు. అక్టోబర్ 1వ తేదీ ఉదయం 7 గంటల నుంచి ఎన్టీఆర్ భరోసా పింఛను పథకం కింద పింఛన్ల పంపిణీ ప్రారంభమవుతుందని కలెక్టర్ వెల్లడించారు. అక్టోబర్ 1న పింఛను తీసుకోలేని వారికి అక్టోబర్ 2న పంపిణీ చేయనున్నట్లు పేర్కొన్నారు. పింఛన్ల పంపిణీ ఏర్పాట్లపై జిల్లాలోని ఎంపీడీవోలు, మున్సిపల్ కమిషనర్లతో కలెక్టర్ గూగుల్ మీట్ ద్వారా సమీక్ష నిర్వహించారు. జిల్లాలో 4,925 మంది సచివాలయ, ఇతర ప్రభుత్వ సిబ్బందిని పింఛన్ల పంపిణీ కోసం వినియోగిస్తున్నట్లు తెలిపారు. పింఛన్ల పంపిణీ రోజున నగదు కొరత లేకుండా ముందస్తు చర్యలు తీసుకోవాలని జిల్లా లీడ్ బ్యాంక్ మేనేజర్‌ను కలెక్టర్ ఆదేశించారు. పింఛనుదారులు తమ ఇళ్ల వద్ద అందుబాటులో ఉండేలా సచివాలయ సిబ్బంది ముందుగానే సమాచారం అందించాలని అధికారులకు సూచించారు. సమీక్షలో డీఆర్‌డీఏ ప్రాజెక్టు డైరెక్టర్ టి. విజయలక్ష్మి, ఇన్‌చార్జ్ జెడ్పీ సీఈఓ మల్లికార్జునరావు, ఏలూరు నగరపాలక సంస్థ కమిషనర్ ఏ. భానుప్రతాప్‌తో పాటు పలువురు మున్సిపల్ కమిషనర్లు పాల్గొన్నారు.