Naidupeta: నాయుడుపేటలో ఘోర రోడ్డు ప్రమాదం.. పాల ట్యాంకర్ ఢీకొని ఒకరి మృతి

తిరుపతి జిల్లా నాయుడుపేట మండలంలోని పండ్లూరు జాతీయ రహదారిపై ఘోర రోడ్డు ప్రమాదం చోటుచేసుకుంది. కిన్నెర 45 హోటల్ కూడలి సమీపంలో కూలీలతో వెళ్తున్న ఆటోను పాల ట్యాంకర్ లారీ వెనుక నుంచి బలంగా ఢీకొట్టింది. ఈ ప్రమాదంలో ఒకరు అక్కడికక్కడే మృతి చెందగా, పలువురికి గాయాలయ్యాయి. స్థానికుల వివరాల ప్రకారం.. కూలీలను తీసుకెళ్తున్న ఆటో జాతీయ రహదారి వద్ద ఆగి ఉన్న సమయంలో వేగంగా వచ్చిన పాల ట్యాంకర్ లారీ వెనుక నుంచి ఢీకొట్టినట్లు తెలుస్తోంది. ఢీకొట్టిన తీవ్రతకు ఆటోలో ఉన్నవారికి గాయాలయ్యాయి. ప్రమాదం జరిగిన వెంటనే స్థానికులు సహాయక చర్యలు చేపట్టి పోలీసులకు సమాచారం అందించారు. సమాచారం అందుకున్న పోలీసులు సంఘటనా స్థలానికి చేరుకుని పరిస్థితిని పరిశీలించారు. పాల ట్యాంకర్ లారీ డ్రైవర్‌ను అదుపులోకి తీసుకున్న పోలీసులు కేసు నమోదు చేసి దర్యాప్తు చేస్తున్నారు. ప్రమాదానికి గల పూర్తి కారణాలు పోలీసుల దర్యాప్తులో తేలాల్సి ఉంది. ఇదిలా ఉండగా.. కిన్నెర 45 హోటల్ కూడలి వద్ద తరచూ రోడ్డు ప్రమాదాలు జరుగుతున్నాయని స్థానికులు ఆందోళన వ్యక్తం చేస్తున్నారు. ప్రమాదాల నివారణకు తగిన చర్యలు తీసుకోవాలని, ముఖ్యంగా వాహనాల వేగాన్ని నియంత్రించేలా అవసరమైన భద్రతా ఏర్పాట్లు చేయాలని వారు అధికారులను కోరుతున్నారు. ఈ ప్రాంతంలో గతంలోనూ పలుమార్లు ప్రమాదాలు చోటుచేసుకుని ప్రాణనష్టం జరిగిన నేపథ్యంలో.. జాతీయ రహదారిపై ప్రమాదకర కూడళ్లను గుర్తించి, అక్కడ అవసరమైన ట్రాఫిక్ నియంత్రణ, హెచ్చరికలు, భద్రతా చర్యలు చేపట్టాల్సిన అవసరం ఉందని స్థానికులు పేర్కొంటున్నారు.