తుఫాన్ ముప్పు.. శ్రీకాకుళం అధికారులను అప్రమత్తం చేసిన మంత్రి అచ్చెన్నాయుడు

శ్రీకాకుళం, సెప్టెంబర్ 21: శ్రీకాకుళం జిల్లాకు తుఫాన్ ముప్పు పొంచి ఉన్న నేపథ్యంలో మంత్రి అచ్చెన్నాయుడు అధికారులను అప్రమత్తం చేశారు. జిల్లా కలెక్టర్ స్వప్నిల్ దినకర్ పుండ్కర్‌తో పాటు వివిధ శాఖల అధికారులతో ఫోన్‌లో మాట్లాడిన మంత్రి.. జిల్లాలో నెలకొన్న వాతావరణ పరిస్థితులు, ముందస్తు చర్యలపై సమీక్షించారు. భారీ వర్షాలు, ఈదురుగాలుల నేపథ్యంలో ఎలాంటి ప్రాణ, ఆస్తి నష్టం జరగకుండా ముందస్తు చర్యలను ముమ్మరం చేయాలని అధికారులను ఆదేశించారు. ముఖ్యంగా లోతట్టు, తీర ప్రాంతాల్లో పరిస్థితిని ఎప్పటికప్పుడు పర్యవేక్షించాలని సూచించారు. అవసరమైతే ప్రభావిత ప్రాంతాల ప్రజలను ముందుగానే సురక్షిత ప్రాంతాలకు తరలించేలా చర్యలు తీసుకోవాలని స్పష్టం చేశారు. తుఫాన్ పునరావాస కేంద్రాల్లో మంచినీరు, ఆహారం, విద్యుత్, వైద్యం, పారిశుద్ధ్యం సహా అవసరమైన మౌలిక వసతులను సిద్ధంగా ఉంచాలని మంత్రి సూచించారు. భారీ వర్షాల కారణంగా వాగులు, కాలువలు, నదులు పొంగిపొర్లే అవకాశం ఉన్నందున ప్రమాదకర ప్రాంతాలపై ప్రత్యేక నిఘా ఉంచాలని అధికారులను ఆదేశించారు. మత్స్యకారులు సముద్రంలోకి వెళ్లకుండా తీర ప్రాంతాల్లో పర్యవేక్షణ పెంచాలని సూచించారు. విద్యుత్ అంతరాయాలు, రహదారులపై చెట్లు కూలడం, రవాణాకు అంతరాయం వంటి సమస్యలు తలెత్తితే తక్షణమే స్పందించేలా సంబంధిత శాఖల సిబ్బందిని సిద్ధంగా ఉంచాలని చెప్పారు. అత్యవసర పరిస్థితుల్లో ప్రజలకు వెంటనే సహాయం అందించేందుకు కంట్రోల్ రూంలు, అత్యవసర సేవలను 24 గంటలు అందుబాటులో ఉంచాలని మంత్రి ఆదేశించారు. తుఫాన్ ప్రభావం పూర్తిగా తగ్గే వరకు అధికారులు క్షేత్రస్థాయిలో అప్రమత్తంగా ఉండాలని, ప్రజల భద్రతకు అత్యధిక ప్రాధాన్యం ఇవ్వాలని స్పష్టం చేశారు. వాతావరణ శాఖ జారీ చేసే హెచ్చరికలను ప్రజలు పాటించాలని, అధికారుల సూచనలకు సహకరించాలని మంత్రి అచ్చెన్నాయుడు కోరారు.